تفاصيل مؤلمة.. نازحون من سنار .. بكاء الأطفال من الجوع يقطع القلب

وجه الصحفي بقناة الجزيرة القطرية، عبدالرؤوف طه، نداءً عاجلًا، لإنقاذ الفارين من ولاية سنار باتجاه ولاية ولاية القضارف شرقي السودان.

وقال في منشور “الناس العندهم عربات وتركترات وترلات في القضارف شيلو عصيدة وموية ومشمعات وحبال (سلب) وشاي وبرتقال وقريب وشيلوا بلح كتير.. وأنسلوين وأدوية ولو عندك باور بانك اشحنه وشيلو معاك وأمشوا على منطقة المقرح والبقدر يمشي ينتظر قدام على الجبال في طريق اب رخم يمشي .. الناس الطالعين من أب رخم فيهم ناس جعانين شديد وعطشانين وما عندهم قروش لان التلفونات اما مغلقة أو اتسرقت”.

وتابع “في ناس راكبين في عربات كاشفة محتاجين مشمعات لان المطر نزل من أمس والدنيا برد وجوع شديد وفي عربات تعطلت في الطريق محتاجة يجروها”، وأضاف “الناس التعبانين أكتر ديل المنتشرين في الطريق بين كبري الدندر وأب رخم على الطرقات من أمس وأول أمس وما في أكل لكن الترعة قريبة بيشربوا منها”

وتابع “الأطفال يبكوا بأصوات تقطع القلب والله بسبب الجوع.. الرضع أمهاتهم ما فيهم لبن بسبب الجوع الشديد.. وما قادرين يشيلوا نفسهم.. العدد النزح دا مقدر بـ 50 ألف ويمكن أكتر.. والله الناس من أمس بعاينوا للسماء وخائفين المطر يارب حواليا ولا علينا”.

وأضاف “نحن كان معنا 31 بلحة أدينا مرضى السكري 5 بلحات وفضل 21 بلحة وزعناها على الأطفال بلحة بلحة.. والله فرحتهم بيها كانت لا توصف مافي حاجة أشد من بكاء الأطفال من الجوع”.

وتابع “في أب رخم اشتريت 2 عصير مازا لأمهات حوامل عشان جاهم هبوط ويومين جوعانات وعطشانات .. وقلت ليهم أشربوها بالدس لأنو الأطفال لو شافوها بقولوا عايزين وما في قروش.. والله شايلات العصير وما قادرات يقيفن ولا قادرات يشربن ويخلن أطفالهن